JILIR JILA KULLAKANAKAX YÄQATAPXAÑAPA MAYIPXI
Jilir jila kullakanakaxa jichhurunakaxa jani yäqatapxatapa qhananchapxi ukampis jupanakata yäqasiña mayipxi.
Aka agosto llumpaqa phaxsina pä tunka suxtani urunaka maykipawaykipanxa jilir jila kullakanakana urupawa amtasiwayi, ukaruxa sawayapxiwa “día de la dignidad del adulto mayor” jall ukhama sutiñchawayapwi. Ukax ch’amanchatawa jupanakana yäqawinakapa askin uñjatañapataki ukatx kamachinakana utji jupanakaru arxatiri ukanakasa jupanakataki aski wakichatañapataki.
Jichhurunakax jilir kullaka jilanakaxa mayipxiwa jupanakaxa askina yäqatapxañapa uksa tuqitxa kullaka Vicenta Mamani paqallq tunka phisqhani maranikipana suyu Omasuyus tuqin yuririkipansa mayiwayiwa kamachinakana siski yäqatapxañapa ukaxa phuqhasiñapa ukasti k’umar jakaña tuqina, kunaymana yanapawinakana.
Maysatxa kullaka senadora Virginia Velasco sarakiwa marka irpirinakaxa aka urunakamaxa jilirinakatakixa vivienda social, renta dignidad ukat juk’amp ch’amanchawinakasa utjawayarakiwa jupanakataki.
Kullaka irpiri Asamblea Permanente de Derechos Humanos El Alto tuqin irpirix sawayiwa, sapa tunka jan walt’awinakata uksaru yatiyapxatapaxa jilpachaxa jiliri jila kullakanakaru ñanqhachawinakawa utji juk’ampachasa wawanakapata jan ukasti yaqha wila masinakata ukatxa markachirinaka masinakapata. Iwxt’iwa jilirinakasaruxa askina yäqasipxañasa wawanakata qalltasina ukhamaraki markachirinakasa kunatixa mä uruxa taqiwa uka thakhiru purirakiñani.
